Найман тонн шатахуун асгарчээ
Онцгой байдлын албанд шатахуунтай цистерн замын хажуу руу унасан гэх дуудлага 10/08-ны 18:24 цагт иржээ. Тодруулбал, Дорнод аймгийн Баян-Уул сумын Уртын адаг баг “Баадайн гол” гэдэг газар /аймгийн төвөөс зүүн хойд зүгт 220 км, сумын төвөөс баруун зүгт 15 км/ шатахуун тээвэрлэж явсан автомашин /цистерн/ замын хажуу руу унаж, шатахуун асгарсан байна.
Дуудлагын дагуу тус аймгийн Онцгой байдлын газрын 53 дугаар ангийн алба хаагчид, сумын Цагдаагийн тасгийн алба хаагчид, “Монгол зам” ХХК-ийн ажилчдыг очиход Дорнод аймгийн Баян-Уул сумаас Хэнтий аймгийн Дадал сумын чиглэлд 12 тонн шатахуун, 5 тонн түлш тээвэрлэж явсан “Beiben North Benz HLQ525” автомашин /цистерн/ замын хажуу руу унаж, дээшээ харсан байдалтай байсныг татан босгож, 8 тонн шатахуун асгарсан талбайд шороо асгаж саармагжуулалт хийжээ.
