“Ноорог”-ийн нэг ажилтны дансаар 9 тэрбум 239 сая 338 мянга 177 төгрөг, 9 сая 430 мянга 54 ам.доллар оржээ

ХЗДХ-ийн сайд О.Алтангэрэл нийгэмд үүсээд буй нөхцөл байдалтай холбогдуулан “Прокурор зөвшөөрвөл “Ноорог”-той холбоотой 9.3 тэрбум төгрөгийн баримтыг илчилнэ” гэж мэдэгдсэн.
Тэгвэл прокурорын байгууллага зөвшөөрсний дагуу асуудлыг ил болгожээ.
Цагдаагийн байгууллагаас Монгол Улсын иргэн М.Б, А.О, А.Б, Н.С, Д.С, Б.Б нар нь фэйсбүүк цахим орчинд иргэдэд сурталчилгаа явуулан бүлэг зохион байгуулалтад орж, мөрийтэй тоглоом зохион байгуулах гэмт хэргийг байнга үйлдэн амьдралын эх үүсвэрээ болгосон хэрэгт мөрдөн шалгах ажиллагааг явуулж байгаа аж.
Тухайн нэр бүхий этгээдүүд нь өөрсдийн болон хамаарал бүхий этгээдүүдийн арилжааны банкны дансыг ашиглан хуулийн хариуцлагаас зайлсхийх зорилгоор гэмт хэргийн замаар олсон мөнгийг хөдлөх болон үл хөдлөх эд хөрөнгө худалдан авах, бизнесийн үйл ажиллагаа явуулах, виртуал хөрөнгө болгох зэргээр хувирган мөнгө угаах гэмт хэргийг үйлдсэн болох нь тогтоогджээ.
Дээрх хэрэгт холбогдсон иргэн А.О нь сүүлийн үед олны анхаарлыг татаад буй “Ноорог” пэйжид ажилладаг ба арилжааны банкны дансуудаар хууль бусаар мөрийтэй тоглоом зохион байгуулах гэмт хэргийг үйлдэж,
Төгрөгийн дансуудаар:
85.179 удаагийн гүйлгээгээр нийт 9,239,338,177.63 төгрөгийн орлогын,
7,996 удаагийн гүйлгээгээр 9,238,306,287.21 төгрөгийн зарлагын,
Валютын дансуудаар:
365 удаагийн гүйлгээгээр 9,430.54 ам.долларын орлогын,
149 удаагийн гүйлгээгээр 9,339.61 ам.долларын зарлагын гүйлгээг тус тус хийсэн нөхцөл байдал тогтоогдож, прокурорын хяналтанд мөрдөн шалгах ажиллагааг явуулж байгаа аж.