Ёс зүйн кодоо чангалж, зарим гишүүнээ эгүүлэн татдаг бол
УИХ 126 гишүүнтэй боллоо гээд эгээ л “сахил хүртээд шал дордов” гэгч болж. Уг нь Ёс зүй, Дэгийн байнгын хороо гэж бий. Гэлээ гээд ч нэмэр алга.
Дөнгөж өнгөрсөн долоо хоногт л гэхэд УИХ-ын гишүүн М.Нарантуяа-Нара, Ц.Мөнхтуяа нар олон нийтийг цахим орчинд басамжлан доромжилж, УИХ-ын гишүүн Б.Найдалаа Төрийн ордонд УИХ-ын гишүүн, Боловсролын сайд П.Наранбаярт “гар хүрсэн” нь ил боллоо.
Шүүхээс гэм буруутай нь тогтоогдчихоод байхад гүрийсээр байгаа Дав.Цогтбаатар гээд тоочвол олон хүн энэ парламентад байна. Дав.Цогтбаатарыг шүүхээс 20сая төгрөгөөр торгож, төрийн албанд ажиллах эрхийг хоёр жилээр түдгэлзүүлэхээр шийдвэрлэсэн.
Гэтэл өнөөх нь оноосон ялыг нь хойшлуулж өгөөч гэчихсэн эгээ л наймаалцаж явна.
Тэд бол ердөө л олон нийтийн төлөөлөл. Гэхдээ Дав.Цогтбаатараас бусад нь намын жагсаалтаар парламентын гишүүн болж, тангараг өргөсөн хүмүүс.
Тухайлбал, Ц.Мөнхтуяа АН-ын, М.Нарантуяа-Нара Иргэний зориг, ногоон намын, Б.Найдалаа ХҮН намын төлөөлөл. Харин гишүүн болохоос өмнө гэмт хэрэг үйлдсэн гэгдэж буй Дав.Цогтбаатар АН-аас УИХ-ын нэгдүгээр тойрогт нэр дэвшин ялалт байгуулсан нэгэн.
Энэ мэтчилэн УИХ-д асуудалтай гишүүн олон байна. Мэдээж анхны 126 гишүүнтэй парламентад алдаа, оноо олон бий. Тэр ч утгаараа УИХ-аас гишүүнийг эгүүлэн татах заалтад өөрчлөлт оруулахгүй бол парламентад хууль батлалцахаар сонгогдсон хүмүүс ёс зүйн хувьд үнэндээ гологдож байгааг хэдэн өдөр хэн хүнгүй харж байна.
Хөөрхий УИХ-ын тухай хууль гэж бий. Гэхдээ тэнд нь 44.1.3-т гишүүний нэр хүнд, бүрэн эрхийг хувийн ашиг сонирхлын үүднээс ашиглахыг хориглоно л гэж байгаа. Мөн 44.1.11-т бүрэн эрхээ хэрэгжүүлэхдээ Байнгын, дэд, хянан шалгах түр хорооны болон нэгдсэн хуралдаанд, эсхүл хуралдаанаас гадуур бусдыг гүтгэж, доромжлохыг хориглоно гэж байгаагаас яг хариуцлага тооцох эгүүлэн татах тухай огт байхгүй.
Тиймээс хууль санаачлагчийн нэр зүүчхээд цахим орчинд бусдыг доромжилж, бүр хоорондоо гар зөрүүлж байгаа биз. Нэгэнт тангараг өргөж, эрх ямба эдэлж байгаа л бол тэдэнд хариуцлага тооцох тогтолцоог яаралтай шинэчилж, чангатгаж эгүүлэн татдаг болмоор байна. Хууль тогтоогчид хамгийн өндөр ёс зүйтэй байх ёстойг сануулмаар байна.
Эх сурвалж: Erennews.mn
