ЭХЯ-ны 74 хүн харьяа төрийн өмчит эрчим хүчний 27 компанийн ТУЗ-ийн гишүүнээр ажиллаж байна
Засгийн газрын тогтоолоор “Эрчист Монгол” ХХК-ийг байгуулж, харьяанд нь уул уурхайн бус төрийн өмчит 44 компанийг нэгтгэсэн. Тус компани нь төрийн өмчит 44 компанийн засаглалыг сайжруулах, давхардсан орон тоог цомхотгох үүрэг хүлээж байгаа юм. Тэгвэл “Эрчист Монгол”-ын харьяанд эрчим хүчний төрийн өмчит 27 компани багтаж байна. Гэхдээ одоогоор Засгийн газрын тогтоолд тусгаснаар 27 компанийн 66 хувь нь “Эрчист Монгол”-ын харьяанд ирээгүй байгаа юм.
Өөрөөр хэлбэл, Эрчим хүчний яам 100 хувь төрийн өмчит 27 харьяа компанийнхаа үйл ажиллагааг хариуцсан хэвээр байгаа гэсэн үг. Эх сурвалжийн мэдээлснээр Эрчим хүчний яаманд ажилладаг 74 хүн харьяа 27 компанийнхаа ТУЗ-ийн гишүүнээр ажиллаж байгаа аж. Үүнээс 32 нь хоёр компанийн ТУЗ-ийн гишүүн, дарга хийж байгаа гэх мэдээлэл байна.
Түүгээр ч зогсохгүй эрчим хүчний салбарт үйл ажиллагаа явуулдаг төрийн өмчит 27 компанийн ТУЗ-ын Хараат бус гишүүнээр хүртэл Эрчим хүчний яамны дарга нар ажилладаг.
Үүнд, сайдын туслахаас эхлүүлээд хэвлэлийн төлөөлөгчид нь хүртэл багтсан байдаг талаар албан бус эх сурвалж мэдээлж байна.
Харин Засгийн газрын тогтоолоор байгуулагдсан “Эрчист Монгол” ХХК нь дээрх ТУЗ-ийн гишүүдийн тоог цөөлөх, шаардлагатай гэж үзвэл татан буулгах, үйл ажиллагааны чиглэлээр нь нэгтгэх зэрэг арга хэмжээг авч ажиллах юм.
