Х.Булгантуяаг эгүүлэн татах асуудлыг хэлэлцэнэ
УИХ-ын чуулганы хуралдаанаар өнөөдөр 10:00 цагт эхэлж, Монгол Улсын 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуульд өөрчлөлт оруулах тухай хуулийн төслийг хэлэлцэх болон УИХ-ын асуулгын цаг товлогдсон байна.
Мөн УИХ-ын гишүүн Х.Булгантуяаг эгүүлэн татах асуудлыг яаралтай горимоор хэлэлцэх товд оруулсан тухай мэдээлэл бий.
Түүнчлэн өчигдөр /2025.10.31/-нд хэлэлцэх байсан Үндсэн хуулийн Цэцэд хүсэлт гаргах саналын тухай /үргэлжилнэ/, Газрын тосны тухай хуульд өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд /Улсын Их Хурлын гишүүн М.Бадамсүрэн нарын гишүүд 2025.07.09-ний өдөр өргөн мэдүүлсэн, хэлэлцэх эсэх, асуулт, хариулт 120 минут/асуудлыг өнөөдөр хэлэлцэхээр хойшлуулаад буй юм. Эргэн сануулахад, Газрын тосны тухай хуульд өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд /Улсын Их Хурлын гишүүн М.Бадамсүрэн нарын гишүүд 2025.07.09-ний өдөр өргөн мэдүүлсэн, хэлэлцэх эсэх, асуулт, хариулт 120 минут/ болон Л.Оюун-Эрдэнэ нарын гишүүдээс өргөн барьсан “Хянан шалгах түр хороо байгуулах тухай” асуудал холбогдох байнгын хороогоор орж хэлэлцэж шийдвэрлэгдээгүй тул өчигдрийн УИХ-ын нэгдсэн чуулганаар хэлэлцээгүй хойшлуулаад байгаа юм.
