Ноорогийн О.Уламсайханы хамаарал бүхий этгээдийн дансаар 9 тэрбум төгрөгийн гүйлгээ хийгджээ
Манай сайт өчигдөр /2025.03.18/ Эм Си Эс-ийн тролл баг Ноорог креатив компаниар халхавчилж үйл ажиллагаа явуулж байжээ гэх гарчигтай мэдээллийг хүргэсэн нь олон нийтийн анхаарлын төвд байна.
Тэгвэл Ноорог-той холбоотой их хэмжээний мөнгө, санхүүжилтийн асуудал сөхөгдлөө. Энэ талаар сэтгүүлч Ж.Мядагбадам Өнөрөөг шалгахдаа цагдаа хувь дансных нь 100к гүйлгээг ч ухсан. Ноорог дансны гүйлгээ 9 тэрбум хүрсэн нь үнэн бол том тв-үүд л магадгүй, энэ нь аль ч медиагийн дансанд байдаггүй мөнгө юм хэмээн бичжээ.
Эх сурвалжийн мэдээлснээр Ноорог-ийн Гүйцэтгэх захирал О.Уламсайханы хамаарал бүхий этгээдийн дансаар дээрх 9 тэрбум төгрөгийн гүйлгээ хийгдсэн нь урьдчилсан байдлаар тогтоогдсон байна. Тэднийг мөрийтэй тоглоом зохион байгуулах замаар дээрх их хэмжээний мөнгийг олсон байж болзошгүй гэж хардаж байгаа аж.
Хууль, хяналтын байгууллагаас Ноорог.мн пэйжийг хөтлөн явуулдаг залуусыг хэд, хэдэн үндэслэлээр шалгаж байгаа талаар өчигдөр мэдээлсэн. Тэднийг иргэдийн мэдээллийг хууль бусаар цуглуулсан, хувь хүний нууцад халдсан байж болзошгүй гэж үзэхээс гадна мөрийтэй тоглоом зохион байгуулсан гэх үндэслэлээр мөрдөн шалгаж, шалгалтын ажиллагааг үргэлжлүүлж байгаа талаар ЦЕГ-ын Кибер гэмт хэрэгтэй тэмцэх газрын дарга С.Тайван ярьсан байдаг.
Үнэхээр эх сурвалжийн мэдээлснээр Ноорог-ийн О.Уламсайханы хамаарал бүхий этгээдийн дансанд 9 тэрбум төгрөгийн гүйлгээ хийгдсэн нь үнэн бол хуулийнхан тэр их хэмжээний мөнгөний эх үүсвэрийг шалгаж, тогтоох нь зүйн хэрэг юм. Нөгөө талд тэр их хэмжээний мөнгөний эх үүсвэрээ Ноорог-ийн залуус ч тайлбарлах хэрэгтэй болж байна.
Эх сурвалж: Erennews.mn
