Ж.Мөнхбат багийн найзуудтайгаа хамтарч Богдхан ууланд барьсан 46 хаусаа 30 орчим тэрбумаар борлуулжээ
Цагтаа УИХ-ын гишүүн гэгдэж явсан Ж.Мөнхбат өдгөө оргон зайлагч болчихсон. Оргон зайлах ч гэж дээ, хуулийнхнаар тохуурхаж яваа. Тэр нүүрсний хэргийн яллагдагч болмогцоо ээжийгээ асрах шаардлагатай хэмээн гуйж түүж байгаад хил давсан. Одоо БНСУ-д туйлж яваа гэдгийг хуулийнхан мэддэг ч “шувуу” ажиллагаа гэхээс өөрийг хэлэхээ байсан.
Уг нь Ж.Мөнхбат хүний итгэл даах нэгэн биш гэдгийг олон нийт аль хэдийн мэддэг болчихсон байсан. Тодруулбал, эхнэрээ зодож, гэр бүлийн хүчирхийлэл үйлддэг нь илчлэгдсэн. Мөн казино тоглож зугаагаа гаргадаг гэдгийг нь ч хүмүүс мэдэх болсон. Олон нийтийн өмнө сайхан амлаад, ард нь “дунд хуруу” гозойлгодог гэдгийг мэргэжлийн боксын тамирчин Э.Цэндбаатар машин өгнө гээд “мурьснаас” нь мэддэг болсон.
Ж.Мөнхбатыг нүүрсний хулгайн гол тоглогчдын нэг байсан төдийгүй хулгайн мөнгөө хууль бусаар угаасан байж болзошгүй гэх асуудлаар шалгаж, өнөөх нь хууль хяналтын байгууллагынхны мөрдөгчдийн гарт орж, шалгаж эхэлсэн байдаг.
Хуулийнхан эхлээд Ж.Мөнхбат болон түүний хамгийн ойрын хамаарал бүхий хүн гэгдэх шадар туслахыг нь байцаагаад, баттай баримт, ноцтой сэжүүр олсон гэдэг. Түүнийг одоо ч эрэн сурвалжилж байгаа нь багийн найз Х.Батжаргалтай нь холбоотой. Өдгөө Боловсролын яамны Төрийн нарийн бичгийн даргын суудалд тухалж суугаа. Өөр нэг найз нь Хөгжлийн банкны дэд захирал асан Б.Чойжилжалбуу. Дэд захирлын алба хашиж байхдаа албан тушаалаа ашигласан хэргээр өдгөө “аав”-ынд суугаа.
Ж.Мөнхбат багийн найз нартайгаа халаас нэгтэй гэхэд болно. Тэд хамтдаа “Архангай аймгийн залуучууд оюутны төв” ХХК-ийг эзэмшдэг нь түүнийг нь батлаад өгчихнө.
Гэхдээ тэд бизнесийн ашгаас илүү хулгайн мөнгөөрөө орлого олдог байсан бололтой.
Ж.Мөнхбат Засгийн газрын ХЭГ-ын дарга байхдаа “Эрдэнэс Тавантолгой”-н захирлаар Д.Ариунболдыг томилох гэж ихэд “чичирсэн”. Санасандаа ч хүрсэн. Тухайн үеэс нүүрсний хулгайн суурь тавигдсан гэхэд хилсдэхгүй.
Цааш нь хөвөрдөөд үзэхэд тухайн үед Богдхан уулын Жаргалантын аманд “Жаргалант” гэх тансаг зэрэглэлийн 46 айлын хаус хотхон баригдсан. Гэхдээ энэ хотхоныг Б.Чойжилжалбуугийн “Марс гранд” ХХК барьсан бөгөөд нэг бүрийг нь 630 сая төгрөгөөр буюу нийт 28 орчим тэрбум төгрөгөөр борлуулсан баримт бий. Ингээд харахаар Ж.Мөнхбат “Нүүрсний хулгай”-н мөнгөөрөө найз Б.Чойжилжалбуугаараа 46 хаус бариулж, мөнгө угаасан байж болзошгүй гэсэн хардлага төрнө.
Цаашлаад ухвал, Ж.Мөнхбат, Х.Батжаргал нарын гурван найзын “Архангай аймгийн залуучууд оюутны төв” ХХК-ийн гүйцэтгэх захирлаар О.Хүрэлтогоо гэгч ажиллаж байсан бөгөөд Б.Чойжилжалбуугийн баз гэдгээ Хөгжлийн банкны хэргийн үеэр ил болгосон. Мэдээж өнөөх тансаг зэрэглэлийн 46 хаусыг барьсан “Марс гранд” ХХК-ийн ч гүйцэтгэх захирал байсан.
Ингээд харахад багийн найзууд хамтдаа нүүрсний хулгайн мөнгөөр их хэмжээний ашиг олсны дээр нэг нь одоо ч албан тушаалд тухалчхаад, амаа үдсэн мэт л сууна.
Эх сурвалж: Erennews.mn
